已經係早兩年嘅事啦!! 但係柬埔寨真係一個幾好嘅地方。
特別係鍾意影相既人就更加要去吓!!
不過柬埔寨啲治安就唔係咁好，所以我就覺得跟團會比較安全。
柬埔寨有好多名勝古蹟都值得一去。等我同大家分享一下我去過嘅地方啦!!
第一站去咗「施漢諾親王皇宮」，雖然有遇著落雨，但係都覺得啲裝潢好靚!!
連地板都用啲有花紋嘅磚，好特別!!
佢地嘅門就更加唔簡單，係成個彿嘅圖案!
施漢諾親王皇宮穿過另一面就會見到好多白塔。行近啲睇，佢地仲起得非常仔細潻!!
中央市場好有特色。真係好多當地人去買野!
柬埔寨人都食好多香港唔會人人食嘅嘢……例如蜘蛛，仲有烏龜囉!! 真係嚇死我!! 
柬埔寨都係亞熱帶地方，周圍都買到椰青，仲要好好飲潻!
不過大家真係唔好以為一個人可以飲得到一個，真係好大個架!! 又重!!
賣芒果的都好利害，可以切到一片片咁，但係又唔斷開!! 成朵花一樣，真係好心機!
另外，大家去就一定要食佢地啲龍眼。你地睇睇下面張相就知，粒粒都好大粒!!
仲以為一定唔好食啦! 點知原來勁甜，好好食!! 真係不能錯過!!
吳哥窟係今次旅程嘅主角。
吳哥窟範圍真係好大，如果自由行就一定唔好諗住一日可以行得哂!
要慢慢欣賞!!
我地由南大門進入，好宏偉! 全部由巨石建成….真係目不暇給!
當然仲有響「向世界出發」睇到嘅巨型樹根啦!!
鍾意影相嘅人入到去真係會好忙!! 好想將所有野都拍下來!
之後我地又要上番車，途經女皇廟，就下車影相。
女皇廟特色就係佢係用啲紅紅的砂石而起建成，又有另一番味道!
跟住又要上番車。向吳哥窟古城出發!!
一落車就見到呢棵葡萄樹!! 生得好大，好靚，忍不住要影低佢!
不過就好快就比吳哥窟古城吸引咗。真係好大，好宏偉!!
咩角度睇都好正呢!!
入到去古城內，好唔明以前啲人點可以起到咁宏偉嘅建築!
再加埋當時嘅藍天，真係靚到好似畫一樣!!
個古城仲起得好高!! 上面張相可能都唔太清楚! 大家再睇睇下面呢張相….
真係斜到不得了!! 我怕高!! 行到腳都軟埋!!
不過無上過去都感受唔到佢嘅宏偉，所以大家都要上去望一望呀!
離開吳哥窟古城後，我地就去咗「洞里薩湖」，佢係全亞洲最大嘅湖。大到係見唔到對面嘅湖邊。
唔講都可能以為自己在海上….
當地居民仲係以捕魚為生!! 好有懷舊feel!!
我地有上咗一間船上學校參觀! 啲學生雖然窮，但係個個都好乖!!
我地無特別準備。上到間學校見啲小朋友咁乖，大家都拿出身上小食，送比啲小朋友!
佢地會等齊所有人手上都食物，佢地先會全班一齊食。仲要係慢慢品嚐地食。 
唔似得香港啲小朋友!! 會爭，仲要無禮貌！！
我地走嘅時候，啲小朋友仲走哂出黎送我地走潻！
遊完洞里薩湖，我地就要坐６小時車由暹粒省番去金邊。
不過回程時，架旅遊巴嘅冷氣壞咗，我地就在公路上停下。
不過都好，我可以落車影吓相。
佢地啲公路好簡單，咩都無，仲要響啲民居旁邊。
其實周圍都好靚架！！
藍天白雲，仲有好多草地，望落真係好 relax!!
其實成個車程來回金邊和暹粒省都係田，加埋藍天白雲。
所以真係唔係好覺坐咁耐車呢！！
不過咁耐車程，我地久不久都會停下，仲比我無意中發現當地嘅巴士！
好利害架，可以坐好多人，加上好多貨物都得！！勁！
回程番金邊途中，我地響黃昏時段再壞車。
個司機同佢助手真係咩都識攪，又係佢地自己整架車。
呢啲時候又係我去影相嘅時候啦……
藍天白雲嘅變化真係大，仲可以好靚！！
我仲發現咗有彩虹呢！！
但係都唔及得上以下嘅日落！！ 真係靚絕！！
睇完柬埔寨美麗嘅一面，我都想講吓當年柬埔寨都曾經有一段黑暗時期。
好多無辜生命都犧牲咗，下面呢張相拍於戰爭博物館，個塔好精緻，但係入面就收集了成千上萬的頭骨，由ＢＢ同成年人都有。
所以大家真係要好好保持世界和平，唔好再要咁多無辜嘅死傷啦！！
Leave a Reply