一般香港人一諗起去陽光與海灘嘅地方就會諗起泰國，我今次有另一推介。

幾年前去過浮羅交怡，好難忘! 旅客不及泰國多。雖然地方也不大，但都比我一種好舒服嘅感覺!

我同個 friend 當時選擇跟團去，有人安排好哂。唔洗煩!!

啲沙灘啲沙雖然唔係好幼，但係一樣好靚。

(我當時仲係好瘦架，可以見得下人，比張相你地睇下啦!! 哈哈….!  )

不過跟團有跟團好，可以有啲平時自己去一定唔會安排嘅節目。第一係睇鷹!!

我地雖然離遠睇，但係都有啲恐怖! 啲鷹都幾大隻，數量又多!

第二就係釣魚啦! 因為覺得比較浪費時間，不過有得玩就梗係照玩啦! 最後我地仲帶埋啲收穫上岸做晚餐潻! 你地睇下條魚幾靚!

熱帶地方果然唔同啲，啲魚嘅顏色都靚啲!! 食落啲味仲好新鮮潻!!  諗起都想食!

講到全個行程最難忘嘅，就一定係去個大浮台上面餵魚啦! 啲魚多到不得了。問你驚唔驚??

個導遊教我地用個水樽入啲麵包入去，響水入面先一啲一啲咁放出來。咁就可以引到好多魚過來。我同我個 friend 玩餵魚都玩咗勁耐囉! 我個 friend 仲玩到唔願停!!

啲魚好好笑架!! 我對脚比較白，時時比啲魚當咗係麵包，係咁走來咬。不過比佢地咬都唔痛嘅，只覺得好痕!! 笑鬼死!!

個浮台都好大吓，以上張相只是其中一角咋。浮台兩邊仲有坐位，可以比你坐住咁餵魚。所以連啲唔識游水嘅人都可以玩啦!! 好細心!!

浮羅交怡啲海水好清架，玩浮潛已經可以睇到好多靚魚。 你地睇張相有咁多人浮潛就知啦!!

另外響個浮台上面，仲有教練教潛水。佢地會安排啲參加者去深水地方潛水，睇啲更大嘅魚! 不過當然係要另外收費啦!! 我當時同個 friend 掛住餵魚，玩哂啲時間!

我仲好記得導遊講過去浮羅交怡最好嘅時候係二月! 啲水最清同最靚。有意去嘅朋友就要注意啦!!!

唔跟團嘅朋友都可以去呢個大浮台玩架。好似可以自己租船接駁去玩架!! (可惜我唔記得咗個大浮台嘅名啦!! 唔知依家啲團仲去唔去呢??)

題外話!! 我仲係浮羅交怡見到一間好靚嘅 KFC想同大家分享下，大家覺得靚嗎?